search


Interdisciplinariedade Proxectual


cartaz_mesa_redonda_baixa
publicado
April 11th, 2018
escrito por
secretaria
categoría
escola, palestras
comentarios
0 comentarios

Interdisciplinariedade Proxectual
Venres 20 de Abril
EASD Antonio Faílde
12:00h. Salón de Actos.

Baixo este título, Pepe Barro, Arturo Álvarez e Sara Coleman, membros do xurado da VII edición dos Premios Mestre 2018, e profesionais de prestixio do deseño galego, achegarannos a súa experiencia en proxectos onde a transversalidade, colaboración e complementariedade interdisciplinar é o eixo principal. Trátase de unha ocasión única de coñecer de perto cómo abordan estes profesionais de máximo nivel cuestións relativas á planificación do traballo, á comunicación e dirección de proxecto en equipos multidisciplinares, o plantexamento do brieffing, a relación co cliente, as incidencias e reorientación do proxecto e comunicarannos a súa visión sobre aspectos metodolóxicos, proxectuais, de produción, de xestión e dirección de equipos multidisciplinares exemplificados en casos prácticos. Despois da exposición, abriráse unha mesa redonda con participación aberta ao auditorio presente.

pepe_baixa
Pepe Barro
Pepe Barro ( Pontedeume, 1955 ) exerce a profesión desde 1972. En 1977 toma conta do proxecto gráfico de A Nosa Terra, alén de outros proxectos para editoriais, grupos de teatro, revistas, etc… En 1985 co-funda o Grupo Revisión Deseño, desde o que elabora numerosos proxectos no ámbito da identidade e comunicación visual, que forman parte xa da historia do deseño gráfico galego e estatal, tal e como recoñeceu a referencial Historia del Diseño Gráfico de Enric Satué. Algúns dos seus traballos mais coñecidos son os primeiros “cuponazos” da Once, a camiseta da Selección Galega de Fútbol, a web da Real Academia Galega, a renovación da Casa de Rosalía de Castro.En 2000 o Museo Reina Sofía, elixiu o de Turgalicia coma un dos cen signos do século XX. Recentemente ten deseñado montaxes de exposicións como a de deseño de moda galega no CGAC “Con-Fío en Galicia” ou a itinerante “Saúde e Terra Irmá(n)s” sobre as Irmandades da Fala Ten recibido numerosos premios como o da Crítica Galega e formado parte de xurados como o dos Premios de Deseño Galicia, Signes, Laus, AEPD, etc… Pepe Barro é autor de numerosos ensaios sobre o Deseño, recentemente compilados no libro O cómo é o que conta.
PEPE BARRO

arturo_baixa
Arturo Álvarez
Arturo Álvarez ( Pontevedra, 1964) é un consolidado creador recoñecido con importantes premios tanto dentro como fóra de España, polas súas achegas conceptuais ao mundo da iluminación de deseño. As súas creacións encontrámolas en Gran Bretaña, Francia, Estados Unidos, Australia, etc…. Desenvolve desde o principio un estilo propio e recoñecible de forte personalidade. Manexa con soltura formas, volumes e fontes de luz dunha forma sinxela e elegante, mesturándoos con mestría e achegando unha nova visión da iluminación creativa, chegando a concibir nos espazos montaxes lumínicas e escenográficas sorprendentes. Na actualidade Arturo Álvarez está a desenvolver novas formas de expresión, coa luz como fío condutor e como protagonista o ser humano e as súas relacións, coas súas luces e as súas sombras, encontros e desencontros. No últimos dez anos vén realizando unha labor exhaustiva de experimentación e investigación desenvolvendo os seus propios materiais que lle permitan maior liberdade creativa e expresividade. Crea e patenta SIMETECH® un material traslúcido que permite moldearse e conseguir texturas diversas. O seu compromiso coas novas xeracións de creadores lévao a convocar o Premio Arturo Álvarez de Xóvenes Talentos.
ARTURO ÁLVAREZ

sara_baixa
Sara Coleman
Sara Coleman ( A Coruña, 1980) Artista e deseñadora de formación híbrida, Sara Coleman é unha creadora inquieta que se enfronta constantemente a novos interrogantes. Recentemente foi galardoada co Primeiro Premio ArtsFAD 2017 e é colaboradora e profesora no Máster en Moda, Arte, Cultura e Sociedade da Universidade da Coruña. No ano 2007 funda a súa propia marca de moda: SARA COLEMAN_Organic Design, presentando as súas coleccións de moda na pasarela Mercedes Benz Fashion Week Madrid e en feiras internacionais do sector téxtil, actividade que veu compaxinado coa docencia en distintas escolas e institucións. Ao longo da súa carreira profesional traballou como deseñadora e patronista para diversas empresas do sector téxtil, ao mesmo tempo que realizou colaboracións como deseñadora de vestiario para Artes Escénicas e como estilista en diferentes producións de moda e montaxes expositivas. No seu continuo interese polos procesos, a creación e a investigación artística realizou diferentes talleres. En paralelo a estas actividades, e consciente do seu propio interese en desenvolver un traballo máis persoal, Sara Coleman atópase actualmente en pleno proceso de investigación e experimentación no ámbito artístico.
SARA COLEMAN

mestre_baixa

Comentar



6 + three =